Nº 8 / Octubre 2.013 – Lhèida. XIen Congrés A. I. Estudis Occitans

 

XIen Congrès
de l’Associacion Internacionala d’Estudis Occitans

Del 16 al 21 de junh de 2014

Universitat de Lhèida
Occitània en Catalonha

Los estudis occitans:
de tempses novèls, de novèlas perspectives.

En 2014 lo Congrès de l’AIEO se tendrà en Catalonha. Serà donc lo premièr còp qu’aquel rescontre scientific aurà luòc dins un endrech ont l’occitan es lenga ofciala. En efièch, l’occitan es oficial dins tot lo Principat de Catalonha dempuèi 2006, e o èra a la Val d’Aran dempuèi 1990. Lhèida, que prepausa a l’ora d’ara los sols estudis occitans de l’Estat espanhòl, aurà l’escassença de venir lo ponch de rescontre dels occitanistas dins un moment estrategic, que i festejarem lo quart de sègle de l’oficializacion de la lenga occitana dins la Val d’Aran, los uèch cents ans de la Batalha de Muret (que ne finiguèt amb lo sòmi de bastir una unitat politica occitano/catalana), los cinc cents ans del Tractat del Plan d’Arrem e los sèt cents ans de la signatura de la  Querimònia, que restaquèt d’una faiçon definitiva un territori occitan -La Val d’Aran- a la Corona d’Aragon. Dins un contexte que Catalohna i agacha tornar-mai Euròpa e que les identitats se tornan a definir, lo vesinatge occitan es estrategic e ven una question de mai en mai actuala.

Los rapòrts de Lhèida e de son Universitat amb lo domeni occitan son estat totjorn constants e estreches. Istoricament, las Tèrras de Ponent son estadas un luòc de passatge entre Catalohna e Occitània, mas tamben un refugi per de nombrosos occitans pendent plusors epòcas istoricas. N’es una pròva la preséncia d’estudiants e de professors d’origina occitana dins l’ancian Estudi General. En fach, lo desvolopement bas-medieval de Lhèida s’es produch dins un rapòrt estrech amb les tèrras occitanas. La cançon Au país de Lerida nos rapèla, d’un autre costat, que quitament lo cavalièr gascon qu’inspirèt Dumas per son D’Artanhan, participèt mai tard al sètge de la vila.

Lhèida es la capitala administrativa del sol territòri occitan de l‘Estat espanhol, la Val d‘Aran. Es tanben la vila que i abotisson las aigas de la Noguèra Palharesa, la ribièra qu’es nascuda dins lo Plan de Beret, dins la comuna del Naut Aran, pas luènh de la sorsa de Garona, lo flume que se geta dins l’Ocean Atlantic a Bordèu.

Enfin, Lhèida aculhís de nombrosas iniciativas ligadas a l’occitan, no solament universitàrias, mas tanben dins los encastres dels mèdias o de l’edicion. A l’ora d’ara, la capitala interiora de la Catalohna deu èsser la vila ont se publica mai de libres en occitan en defòra del territòri occitan. Qui sap s’es per aquò que, en davançant l’istòria, l’escrivan aranés mai important, Jusèp Condò (1867-1919) comencèt a Lhèida sa carrièra literària?

Es evident que en 2014 dobrís una novèla estapa per Catalhona e per l’occitan en çò nòstre, e donc tanben per la recèrca sus la lenga e la literatura ocitanas. Es ora de far lo bilanç en çò que concernís la filologia, de saber çò qu’avèm e de far lo ponch sus mai d’una question, mas tanben de dessenhar de novèlas perspectivas per anar plan luènch dins l’avenidor.

Contacte i informació:
Càtedra d’Estudis Occitans
Plaça Victor Siurana, n°1
E – 25003 Lleida (Catalunya)
Tel: 0034 973 00 34 66
Fax: 0034 973 70 20 54
Ceo@filcat.udl.cat

Deixa un comentari

L'adreça electrònica no es publicarà. Els camps necessaris estan marcats amb *